Open Bank O‘zbekistonda birinchi islom banki litsenziyasini oldi

Open Bank O‘zbekistonda birinchi islom banki litsenziyasini oldi

    Markaziy bank boshqaruvi 23 oktyabr kuni islom moliyaviy faoliyatiga ruxsat berish to‘g‘risida qaror qabul qildi.

    O‘zbekiston Markaziy banki mamlakatda islom bankingini tashkil etish bo‘yicha birinchi litsenziya berilganini ma’lum qildi. 1-I raqamli hujjat Open Bank’ga topshirildi. Tegishli qarorni tartibga soluvchi organning boshqaruvi 23 oktyabr kuni qabul qilgan.

   Litsenziya «Banklar va bank faoliyati to‘g‘risida»gi qonunning 5-1-moddasida nazarda tutilgan islom moliyaviy operatsiyalarini amalga oshirish huquqini beradi. Bular quyidagilar:

• mijozni moliyalashtirish yoki pulni foydani taqsimlash shartlarida investitsiya omonatlariga jalb qilish (mudaraba);
• agentlik shartnomasi asosida pul berish va hisobvaraqlarga mablag‘ jalb qilish (vakala);
• tovarni bo‘lib to‘lashga sotish orqali mijozni moliyalashtirish (murabaha);
• tovarlar uchun oldindan to‘lov orqali mijozni moliyalashtirish (salam);
• birgalikdagi faoliyat (sheriklik) yoki yuridik shaxslarning ustav kapitalida ishtirok etish orqali moliyalashtirish (musharaka);
• mulkni sotib olish huquqi bilan islom ijarasiga berish (ijara).