O‘zbekistonga pul o‘tkazmalari qariyb uchdan bir qismga oshdi, MB 2025-yil uchun prognozni yaxshiladi

O‘zbekistonga pul o‘tkazmalari qariyb uchdan bir qismga oshdi, MB 2025-yil uchun prognozni yaxshiladi

      Birinchi chorakda O‘zbekistonga 3,3 mlrd dollar pul o‘tkazmalari kelib tushdi — bu o‘tgan yilga nisbatan 32% ga ko‘p. Markaziy bank buni hamkor davlatlar valyutalarining mustahkamlanishi va daromadliroq mamlakatlarga migratsiyaning o‘sishi bilan bog‘lamoqda. MB 2025-yil uchun pul o‘tkazmalari prognozini yaxshiladi.

       Markaziy bank ma’lumotlariga ko‘ra, yanvar va fevral oylarida pul o‘tkazmalari 1 mlrd dollardan oshgan (o‘tgan yilning shu oylarida ko‘rsatkichlar 800 mln dollardan past bo‘lgan), mart oyida esa deyarli 1,2 mlrd dollarga yetgan.

Dastlab 2025-yilga mo‘ljallangan rasmiy prognozlarda xalqaro pul o‘tkazmalari hajmining o‘sishi 10−12 foizga baholangan edi. Biroq Markaziy bank bu prognozni 15−18 foizgacha yaxshiladi.

    Bunga mehnat migrantlarini qabul qiluvchi mamlakatlar valyutalarining mustahkamlanishi, ushbu davlatlarda ish haqining o‘sishi, shuningdek, yuqori daromadli mamlakatlarda ishchi kuchiga bo‘lgan talabning oshishi turtki bo‘ldi.

    Shu bilan birga, iqtisodiy hamkorlar valyutalarining kutilayotgan yuqori o‘zgaruvchanligini va ularning iqtisodiy o‘sish prognozlarini pasayish tomonga qayta ko‘rib chiqishni hisobga olgan holda, kelajakda o‘tkazmalar dinamikasida ma’lum bir noaniqlik saqlanib qolmoqda.

Xususan, yil boshidan buyon Rossiya rubli va Qozog‘iston tengesi kursining mustahkamlanishi kuzatilmoqda, biroq ushbu valyutalarda neft narxining pasayishi kutilayotgan bir paytda muayyan devalvatsion bosim yuzaga kelishi mumkin.

    Markaziy bank, shuningdek, transchegaraviy pul o‘tkazmalari dinamikasi ichki talabni qo‘llab-quvvatlash va aholi daromadlarining o‘sishida muhim omil bo‘lib qolayotganini ta’kidladi. Milliy statistika qo‘mitasi ma’lumotlariga ko‘ra, birinchi chorak yakunlariga ko‘ra, xorijdan pul o‘tkazmalarining mamlakat aholisi umumiy daromadlaridagi ulushi 15,8 foizdan 19,5 foizgacha oshgan.

    Markaziy bank raisi o‘rinbosari Abror Mirzo Olimov avvalroq pul o‘tkazmalarining o‘sishini 2025-yilda dollar kursi barqarorligining omillaridan biri sifatida ta’kidlagandi.

    Eslatib o‘tamiz, 2024-yil yakunlariga ko‘ra, O‘zbekistonga pul o‘tkazmalari hajmi qariyb 30 foizga o‘sib, 14,8 milliard dollarni tashkil etdi. Rossiyadan tushumlar 29 foizga oshdi, ammo uning ulushi pasayishda davom etmoqda. Shu bilan birga, AQShdan pul o‘tkazmalari 35 foizga, Buyuk Britaniyadan 1,8 barobarga, Koreyadan 1,6 barobarga oshdi.

   2025-yil boshida 1,35 milliondan ortiq o‘zbekistonlik xorijda ishlayotgandi — bu bir yil oldingiga nisbatan 34 foizga kam. Xususan, Rossiyada ularning soni 1,7 barobarga kamaygan. Shu bilan birga, mehnat migrantlarining o‘z uylariga qaytish tendensiyasi davom etmoqda.

   Yaqinda O‘zbekiston hukumati vatandoshlarni, jumladan, xorijda ishlayotganlarni Yangi Toshkent qurilishiga taklif qilgandi. Qabul g‘isht teruvchi, santexnik va elektrik kabi 38 ta qurilish mutaxassisligi bo‘yicha amalga oshirilmoqda, maosh 8−15 mln so‘mni tashkil etishi aytilmoqda.

https://www.gazeta.uz/oz/2025/05/22/money-transfers/